انفلونزا الخنازير

كنا نربى طيور فى البيت
وزة وبطة وكمان كتكوت
ولما صابتها الانفلونزا
جاها فيروس خلاها تموت



والانسان كان لما تجيه
انفلونزا طيور تؤذيه
ولا كان يعدى انسان غيره
ولا كان غيره كمان يعديه


انما الايام دى الوقت خطير
انفلونزا تصيب خنازير
والانسان بقى ينقل عدوى
لانسان تانى ضررها كبير


والفيروس خد وقت قصير
حور نفسه وشكله اتغير
لف الدنيا وجاب اخرتها
خلا العالم كله اتحير


ومفيش مصل يحارب الداء
ومفيش طب يلاقى دواء
ربك الطب وكل العلماء
خايفينه يقلب يبقى وباء


غرنا علم الناس ونسينا
لما طلعنا قمر بسفينة
ان علوم الدنيا بحالها
علوم انسان مخلوق من طينه


وجانا فيروس مفعوص بيذكر
الانسان ابو عقل يفكر
مهما العلم بيعلى ويكبر
اياك تنسى الله اكبر